Thihna leh Anni!

Thihna kut vawt chuan hausa emaw, rethei emaw a thliar hrang lova, mi lar an ni emaw lar lo ber ber pawh ni se, a dah hrang chuang lova; nu leh pa, a pui a pang a lian a te thlengin tumah a zuah ngai hek lo. Chu thihna chuan i inchhungkhurah ro a lo rel ve tawh pawh a ni thei a, a la rel lo pawh a ni thei. I tawn tawh avangin mi lungngaihna pawh i tawmpui phak lo mai thei a, i tawng tawh a nih pawhin miin i lungngaihna leh manganna an tawmpui pha lo ang tih pawh i ngaihtuah phak ngei ang. Hei le, kan mi larte zinga nu emaw pa emaw then tawhte'n engtin nge an tawrhna chu an sawi chhuah le?

Grace VL Pachuau

'Via Dorolosa' hitmaker Gracy V Pachuau pawhin nikun July ni 13 khan a pa duhtak, PC Rosanga chu pumpui cancer avangin a lo sun tawh a. A lei Pathian taksain a kalsan tak avangin, "Engkim hi a buai tawp," a ti.

Gracy chuan, "Malsawmna leh lungngaihna ka dawn a, ka tawrhtea min hnemtu leh lawmpuitu ber a ni a, a awm lo chu engkim a danglam, a ruak huai chiang khawp mai," a ti. A pa awm loh hnuah chuan harsatna leh lungngaihna a tawk zing tawh hle niin Gracy chuan sawiin, "A dam laia harsatna ka tawh tura ka ngaih ngai lem lohte chu, tuna a awm loh hnuah chuan ka tana sut tlang huphurhawm tak, harsatne leh hrehawmna chuan ka chungah buaina a rawn thlen a ni ta ber. Mahse, Pathianin min thlamuan ve zel a, eng em chu ka thlen ka ring lo," tiin a sawi.

An inchhungah a pa chuan a damlaiin sulhnu tam tak a lo hnutchhiah tawh a, chu'ng a pa sulhnute chu tunah chuan lungngaihna leh lunglenna bak a chang tawh loah ngaiin, a sulhnu zawng zawngte chhui a lo ngai ta chu a changin tawrhthiam harsa a tih thin thu a sawi a ni.

A pa awm lo ta chu tuar viau mah se, a lehlamah chuan amahah pawh a tha zawngin danglamna engemaw tak a awm tel tho niin Gracy chu a inhria a. A pa aiawha thil tam tak tih a tul chang a awm tak avangin, amah ngei pawhin rilru leh taksa lamah puitlinna kawng nasa takin a zawh phah nghe nghe niin Gracy VL Pachuau chuan a sawi.

F. Laldinmawii (Dindini)

Kumin May ni 27 khan chawkawng cancer avangin F. Rozawna chu a boral a, chu chu 'Lung A Leng Em Mai' tih hla avanga kan hriat lar tak em em, F. Laldinmawii, Dindini pa a ni.

Dindini-te chhungkua chu tunhma chuan pathum an ni thin a, chhungkaw hlim tak an ni thin. Mahse, kumin May thla chawhnu atang khan an chhungkua atangin pakhat chuan a chhuahsan a, pahnih chuah an ni ta. Dindini te nufa kalsan tu chu an chhungkuaa pa ber a ni a, tunah chuan pa awpna hnuaiah ni lo, nuin engkim a ruahmana, a enkawlna hnuaiah an khawsak a ngai tawh a ni.

Tunah hrih chuan Dindini pawhin a pain a boral san avangin hrehawm tih chang nei mah se, nakkin lawka a tawn tur chu a hre lawk ran a. Ti hian a ti a, "Tunah pawh hrehawmna chu a tam mai, inleng neuh neuhte kan la nei a, heng kan inlengte hian min la chhawk zangkhai hle; mahse, nakkinah chuan chungho chu an bo dawn, a hrehawm telh telh dawn," a ti.

A pain a awmpui lai khan an chhungkua chu pathum chauh an ni a, heti chung pawha tlem an intih tawh nak alaia, pakhatin a kalsan leh ta si hi anni tan pawh tawrh thiam a har khawp ang. Dindini chuan, "Pathum atangin pakhatin min kalsan a, pathum pawh kha tlem tih tawh nak alaiin, pakhatin min han kalsan leh ta chu engemaw zawng takin a thinrimthlak," a ti a. "Chhungkaw tlem deuh hrehawm tih tawh nak alaiin, a tlem zawnga khawsak chhoh a ngai leh ta kher hi a hrehawm a. Chhungkaw rual deuh han hmuh changte hi chuan ka thin a rim tawp zel," tia sawiin khawi lo kala a vah chhuah changa, a thiante nu emaw pain emaw a hruai thin chu a awh ve ngawih ngawih chang a ngah thu a sawi bawk.

A pa dam lai kha chuan pa hlutna leh mawina, tangkaina hi a hmuh phak rual lova sangah awmin, tuna a kalsan hnuah kawng engkima a hlutzia a hre tha zual sauh a. Hetia a taka pa hlutna hre tur khawpa a lo tawnhriat tawh chu a thiante hnenah pawh tlangau puiin, "In nu leh pa te hi zahin, an dam lai ngei hian duat hle rawh u," tia a thiante a chah lawm lawm thin niin Dindini chuan a sawi a. "Kei chuan a takin ka tawng tawh a, nu leh pate hlutzia chu nitin ka hre chho zel a, an damlaia lo palzam mai mai thin kha, an awm loh tak siah chuan an hlutzia hi a lo lang chiang em a ni," tiin a sawi bawk. 

Lalmuankimi (MK-i)

June ni 15 a ni a, hlim leh lawm takin YMA Day chu an chhung-kua pawhin an hmang ve dawn emaw an tih lai chuan, MK-i te chhung chuan pa ber an sun a, an lo beisei ngai loh leh, midang hnena thleng tura an lo ngaih thin chu an chhungkua chungah pawh a rawn thleng ve ta.

Hriatthiam har ti engmah mah se, a nunna pawhsei sak thei tu an ni tih an inhre chiang a, MK-i pawhin a dinhmun tawnah chuan huaisen tak leh tuarchhel takin lunngaihna leh tahna chu a hmachhawn a, a pa Upa Lalthianghlima'n an chhungkaw enkawl leh awpna chhungkhur chu a kalsan miau si!

MK-i chuan a pa a boral hnuah, pa ber awm tak loh hnu chuan an chhungkua a ruak huai niin a ngai a. Hetih rual hian, an unau pawhin puitlinna kawng an zawh phah nasa hle niin a sawi a. “A lo thleng a, kan ni nghal a ni mai a, a ni lo zawnga han lak vel kha tha ka ti lo. Tihtheih awm tawh bawk lo nen,” tia sawiin amah ngei pawh a nitin hnathawhna lamah-te a puitlin phah nasa hle niin a sawi.

“Min la awmpui se chuan tuna kan koah kan nghah tam tak hi ka pa koah kan nghat ngei anga, keini pawhin puitlin kawng kan zawh har ngei ang,” tiin a sawi bawk a ni.

Unau pahnih chiah an ni a, anni pahnih leh an nu chuan pa ber awm lohna inchhung chu an enkawl a, hriatthiam har ti mah se dam takin an chunga thil thleng chu an pawm a ngai ta a, pa ber sulhnu chu chhui zovin inring lo mah se,  chhungkuaa pa awmlohna chuan an unauvin puitlinna kawng a zawh phah nasa hle niin a sawi.

J&J

J&J tia kan lo hriat tawh thin, 'Emily' hla te avanga kan hriat chhoh Tete-a te unaute pahnih chuan pa awm lohna inchhungkhur chu an chan tawk a lo ni chho a, kumin May ni 4 khan an pa duhtak, J. Sawikunga chuan accident avangin a boral san. 

J&J te unau hian an chhungkuaah chhiat an tawk ngai lo, tunhma chuan. A pi leh pute bula awm lo an nih avangin an pi leh pute'n an kalsan pawhin an inchhung-khurah a thleng lo; mahse, tun tum chu an inchhungkhurah ngei chhiatna chuan a thlen chawpchilh a, nat lawkna pawh awm hauh lovin, a pa thih thu chuan an va deng chawpchilh nghal a. Nat lawkna chu awm se chuan tawrh thiam dan tur pawh a awm tur.

Pa ber han awm lo ta mai chu Tete-a chuan na a tih thu a sawi a, hetiang chhiatna an tawh avang-in, tunhma ang em em chuan hnathawh a phurna pawh a tlahniam niin a sawi nghe nghe. "A hma ai chuan ka tang tawh lovin ka inhria, hnathawh lamah pawh ka peihna a bo, ka pa ngaih lunglen avanga awm chu ka ni lo ang. Mahse, ka tha thona chu a bo ruakin ka hria," a ti a. "Lungleng tih vak vak ka nei lo, keimaha ka tha thona chu a awm tawh lo emaw ka ti thin, insiamthat deuh chu ka ngai a ni," tia sawiin Tetea chuan, "Hetia awm awl tawp mai hi ka awm duhdan a ni tan deuh tawh mai a, ka pa nena hnathawk dun reng thin kan ni a, keimah maia han thawk chhunzawm leh tur chuan ka huphurh deuh," tiin a sawi bawk.

Tunah hrih chuan thlarau miin 'Ka hul' an tih ang chi a nih deuh tan deuh tawh thu a sawi a. Tetea chuan an in-chhungkhurah, pa awm lohna inchhung a nih tawh avanga, pa chan chang a ngaih chang leh mawhphurhna a len zia te pawh a ngaihtuah thin. Amaherawh chu, tunah rih chuan hna-thawk leh tan tura tha thona a neih hrih lo niin a sawi.

PBK-a

Gospel singer PBK Liankhuma hian kum 2004, June ni 14 khan a nu a lo sun ve daih tawh a. An unau zinga mipa awmchhun niin, a nu chu Vanlalkungi a ni, lungphuchawl avangin a boral.

"Nu hmun ruak luah khah tur a lo zau khawp mai. A awm tak loah chuan tihtur a tam a, pa kan la nei hian tlemin min la chhawk zangkhai zawk a. Inchhungkhura ka nu hmun ruak kalsan hi tumah rengin an luah khah theih ka ring ngai lo.

Pathian neitute kan ni a, chu chuan min veng mai mai niin ka hria. Pathian chu awm lo se chuan, lungngaia kan indawm kun tur ka ni a, Lalpa'n min luah sak zela ka nu hmun ruak, Pathian zarah heti hi kan la ni hram hram chauh zawk e.

Ka nu ni lovin, ka pain min boral san leh ta se, tawng -thu-chhe-lovah, kawng chu ka bo viau ang! Mihring mihrinna atang ringawt pawhin ngaihtuahna a kal thui duh khawp mai a, ka pa hi a chakvak tawh lo bawk nen. Keipawh ka inbuatsaih chhoh ve a hun tawhin ka hria.

Mihringte chu boral vek tur kan ni a, ka pa ngei kei, nge ka unaute kal hmasa zawk dawn ka hre lo. Kei ka lo kal hnuhnung ber pawh a ni mai thei a. Tin, ka unau dangte chu pasal neia kan in lum min chhuahsan vek tur an ni a. Ka chungah mawhphurhna a tla lian hle tih pawh ka hria. Ka chungah engkim a innghat titih chu a ni ta reng mai a. Hetiang a ka nih nuai avang hian Pathian chunga innghah tawp loh chu tih theih ka neiin ka inhre lo. Pathian min hruaina hnuaiah kan dai chho mup mup ve ang chu. 

Ka nu khan, a damlai ngei khan hetia kan theih ang tawk tawka kan rawngbawlna te min hmuhpui thin se ka ti thin. Dik taka sawi chuan, ka nu tawngtaina avanga piangthar ka ni, a tawngtai chhuah ve liau liauah ka inngai a, min la dampui se, ka rawngbawlnaah te pawh mi back-up ve ngei awm sia. A takin ka theih ang tawk tawka zaia ka rawngbawl ve na te hi min hmuh pui ve se tih chang pawh ka ngah thin asin."