Thian Dun titi - Gospel Singer rui an sawi sar sar a!

"Kan gospel singer pakhat a rui rap,” tiin a thianpa chu a hrilh mawlh mawlh a. A sawi tak thlen hun erawh a rei ve angreng tawh fu. Titi erawh a la ti tam viau!

Tunhma deuh kha chuan, Mizo thalaite internet hmang thang zingah mIRC chat hi a lar fu a, internet lama mi hrat ve deuh hlek tawh chin zingah mIRC hi hre lo fa an awm law’ng e tih tur hial khawpa lar a ni. Mizote pawhin mahni hnam tawnga ‘chat’-na hmun hi an siam thluah a, tunhnaiah erawh mIRC hi a lun tawh lem lo, tunhma angin. Awm chu a la awm tho.

mIRC lo hmelhriat ve tawh, tunhma deuh pawha he ‘chat’ kaltlanga inkawmngeih ve em em thinte vhu an titi a. Tunhnaiah hnathawhna avangin an inhmu khat a, a hma angin inkawmna hun an nei thei tawh lo. Thiandun pahnih zinga a mipa hi a mIRC khat tawh viau niin a insawi a, a hmeichhia zawk hi chu a khat tawkin mIRC a la hmang zeuh zeuh thung niin a thianpa nena an titi-naah an sawi bauh bauh a.

“Internet-a Mizo thalai intawhkhawmna in-pui pakhat chuan...” tiin hmeichhia chuan a rawn sawi khauh khauh a. An intawhkhawmna hming erawh a la sawi lang chiah lo. A thianpa bulah chuan, “Gospel singer ho pawh hi... “ tiin pakhat chet mawi loh avangin Pathian rawngbawla zai thin zawng zawngte chu hmer tel a tum titih a. Chutih lai chuan a thianpa chuan hriatchian chak ni awm takin, “Nge gospel singer ho chu....” tiin a lo zawt let khauh a. Rang zetin a thianpa bulah, “Engmah an ni bik lo e. Tlin lo tih inhriat chuan, Pathian hla te hi sak loh ve mai tur ania,” a ti chhuak phawng mai!

Thil thlenna hmun a sawi chu Park Eden a nih thu thlengin a sawi dap dap a. Mita hmutu zingah a tel ve ngei niin a hmeichhia chuan a thianpa chu a hrilh a. A thianpa pawhin thu puarpawleng a lo hriat ve deuh tawh thu a sawi hnuah phei chuan, an thu a inphaman chho sawt hle.

A tirah tak chuan, Pathian hla sa thin a nih leh nih loh lam a lo hriat miah loh thute, chu nu nen chuan an inbiak ngai lem loh thute sawiin hmeichhia chuan a thianpa bulah, “Engnge kha a hming kha.. “ tiin a thianpa a zawt thut a. Thuthang eng engemaw a lo hriat ve nial nual tawh avangin a thianpa chuan awlsam zetin a lo hrilh a. “Aw.. chu nu chuan Pathian hla a sa ve ur ur thin an tia. Keichuan ka lo hre ve lo reng reng,” tiin a thianpa chu a hrilh. Pathian hla a sak avangin eng huangah ber nge chu a hre lo, Lelte Award a dawng tawh niin a hre lawi bawk si.

Rin ai takin an titi a kaltluang fu. A hmeichhia zawkin sawi nuam a tih vang pawh ni lovin, hmeichhe zu in leh rui chu a hmuh ve nual tawh a, mak a ti hran lo. “A hnuah Pathian hla sa thin,” tia an sawi a hriat hnuah mak a tih avangin a thianpa bulah a sawi chhuak chauh zawk a nih thu thlengin an sawi dun a. A thianpa chuan thu puarpawleng atanga a lo hriat dan chu a thiannu lo hrilh vein, “Picnic ni khan, zu chauh a rui lo an ti,” a rawn ti zauh chu. “Zu chu a rui ngei, thildang erawh chu ka hre lo,” tiin a lo chhang let a. A bak pawh chu an sawi tel nual mai!

An titi tihtawp dan an thiam tawh dawn lo emaw tih tawh hnuah, an tunhma chanchinte an sawi chhuak leh a. mIRC vela an inbiak nasat theihzia te leh an inbiak khat thute an sawi tak hnuah chuan an then thei ta hram a.