Zoawi Lelte kha - I

  

Ka rilru te te chuan "Zoawi Lelte" tia a hming an lo phuah kher kher hi chu a fuh thlawt ka ti nauh nauh a. An hun laia tlangval hun hmang chho ve, tuna KTP pawh 'over' na rei ve angreng tawh pakhat hnena a chanchin ka zawha, a sawi hmasak ber pawh, "An concert en turin ke ringawt paw'n Vanapa Hall kan pan tang tang peih," a tih ngat kha a ni. Vanapa Hall leh an awmna veng chu inhlat tak a ni. Ka mi ngaihsan, duh ang tawka a vanglai ka nang ve hman lo chu vanduai ka inti a; mahse, a damlai ngeia a bula hun ka hmang thei le, he thu ziak thei tura hun tha min siamsak a, hlim taka kan inkawm thei bik chu a ruk tak chuan ka inchhuang hle. Chumai a la ni lo, amah kawm tum midangte lo hnar a, kei erawh min han hnar lo tih ka hriat hnuah phei chuan, lawm veng veng tak ka ni tawh!
    Inkawmna hun min siamsak tur niah kan inbiakpawh hleihtheih loh avangin, a tukah an in lam pan chuan ka inkhalh 'risk' thla thuai a. Chutah an in ka la hriat loh avangin, Mapuii Fanai chu ka pun ringawt a. Vanneihthlak takin min lo 'aw' sak hlauh piah lamah, a bula ka awm loh min hlauhpui a ni chek ang a, Zonet office-a ka awm lai pawhin tum hnih chu min rawn phone hman hial a ni.



    Tichuan, tui ka nih tan ek ek atanga "Zoawi Lelte" tia a hming an lo phuah daih tawh chenna, Chawnpui chu kan thleng a. An inah kan lut a, kan in chibai ta a. Mahse, ka rin ang a ni hauh lo mai! Ral khat atanga ka lo hriat dan leh ka lo suangtuah dan chu min thaichhiat tir chiang hle a. An sawi ang em emin a hmel a ngui lova, hlim hmel tak pu chungin min lo chhawn a, taksa hriselna lama harsatna nei hmel pawh pu lem lovin min lo thleng a, min ti zam letling zawk, mak ka ti teh asin! A ni ang kum te zatin, taksa hrisel lohna a neih angte nei ngat ila chuan, khatianga mi lo chhawn kha ka tlin ka ring lem lo! A tuarchhelna chuan a rilruah hlimna a pe emaw chu aw ka ti vung vung nghal ringawt a. 

   
Zoawi Lelte atanga Hmangaihna Vanduai
    Thuthmun kan rem fel hnu chuan, kan han inkawm chho malh malh nghal a. Sawi hreh a neih lem loh thu leh, zawh hreh nei lem lo tura ka laka a inkau em em thuin bul a rawn tan. A pa sulhnu chhui turin January ni 1, 1955 khan Vankhama leh Laldengi te nupa inkarah a lo pian thu leh, a tet laia naupang luhlul a nih thu te, a u Vanhlupuii chuan a pa thu a awih zawk thutein bul kan tan a. Zoawi Lelte ngei mai chuan, "Ka u Vanhlupuii chuan ka pa thu a awih a, zai luihtir hi a ngai ngai lo. Keite chuan ka pa thu awih hek lo," a rawn ti bauh bauh a. "Ka pain zai tura min tih pawhin ka zai duhlo reng a; a chang chuan min zai luihtir thin. Ka u chu a ni ve lo reng reng," a rawn tih hnuah chuan kan nui hak a. A zai chhunah pawh teng deuh deuha a zai thin thu te rawn sawi chhovin, "Kei chu a teng hi ka ngaina a, zai tura min tih chuan ka au teng nghek nghek zel," a tih lai chuan kan nui nasa hle. Kan boruak a uap churh churh lem lo.
    A pa chungchang hi kan sawi lem lova; ram leh hnam tana mi ropui leh hlu tak a nih thu chu ka bengah hian a cham reh chuang hek lo. Kan titi mawlh mawlh lai te chuan a pain thu leh hla lamah Mizo hnam tan sulhnu a hnutchhiah hnem malh malh thu an lo sawi thinte, a pa hlutna leh ropuina hi keini ang thangthar zawkte zingah a hlutna kan hre tawk lo leh hlut thiam tawk lo kan kat nawk dawn a nih hi tih te ka bengah a rawn ri chhuak daih a. Chutianga hnam tana mi ropui leh hlu tak fanu, a pa sulhnu chhuia Zo rimawi khawvela mi ropui ber pawl bula ka titi suam suam ngam ve mai kha ka zam rilruk phah deuh tlatin ka inhre hial a ni.
    A hnen atang ngeia 'Zoawi Lelte' an tih chhan leh lo pian chhuah dan hriat ka duh thu ka sawi a, a ni lah chuan phur em em maiin a aw a thian a, a sawi chho mawlh mawlh ta. "Pasal ka nei tur kha, Zirsangzela Hnamte hian min lo ui ve em em a, min uina thu chu hlaah siamin, ka lawi tawh hnuah min rawn 'present' a, chu chu 'I Chul Tur Hi A Pawi Ber' tih hla a ni," a ti a. Pi Vanlalruati chuan, "Chu hla min present chu mawi ka ti lutuk a. Midangin sa se ka ti em em a, Zualbawihi-te kha ka hnawn a; mahse, a sa zak bawk si," a tih hnuah muang charh hian, "Midang ka hnawn hnuah an sak duh tlat loh avangin keimah ngeiin ka sa ta a ni," tia sawiin, kha hla a sak atang khan 'Zoawi Lelte' tia kohna dang a dawn tan thu a sawi a ni.
    Chutia kan sawi lai mek chuan, Hmangaihna Vanduai chungchangte pawh kan sawi kai chho a. Amah hi hmangaihnaah a vanduai thin avanga he hla hi a phuah nia ka lo rin thinna chu, "Ka u phuah emaw an ti fur a, ka phuah a nia," a tih hnuah min khengbet chiang hle, keimah ang bawk hi an awm chu ka ring ve tho! A u Vanhlupuii phuah emaw an tih ziah thu a sawi hnu lawkah a phuah chhanah a rawn kangkai nghal zat a, "Ka unaunu pakhat hi pasal nei mai tur dinhmunah a ding a, a pasal tur pawh biak fel vek a ni tawh. Mahse, a pasal tur phaia lehkhazira awm chuan nupui a rawn hawn a," tiin Pi Vanlalruati chuan a rawn sawi chho. Sawi zawm zelin, "Khatia nupui a rawn hawn san ta kha ka rilru a lo nat pui lutuk a, 'Hmangaihna Vanduai' tih hla kha ka phuah ta mai a ni," a ti.

Zan 1 thilthu vangin ni 10 phuar!

    A pasal nena an intawn dan leh an inneiha thil danglam tak a tawng niawma miin an sawi te chu inthlahrung takin ka zawt dek dek a, a ni lah pek chuan ka inthlahrun hmel deuh nge ni, inthlahrung lo turin leh ka duh duh zawt pawp pawp tura min tih hnuah chuan a sawi chho tan ta. "Kan pa leh ka u te hi a tirah chuan an inkawm nasa daih zawk," tiin bul a rawn tan. "Ka u te nen inkawm mah se, thian angin kan in en bang chuang lova, thiantha lutuk angin kum 10 dawn chu kan in en. Mahse, zan khat thil thuah kan inngaizawng thut a!" a rawn ti ta! An inngaihzawn chho lai vel atanga an inneih dawn thlengte khan, a vanglai hun ve tak tak tawnga, amah ngaizawng duha va 'chitrahar' ve neuh neuh an awm ve nual thu a sawi bawk a ni.
    Inngaizawngin inneih duh mah se, a chhungte chuan an phal hauh lo niin a sawi a. "Chhungten an remti lo," tia sawiin, "Keia phu loh mi tha tak tak an rawn inlar zut a, chuta kara lehkha pawh thiam lo, matric pawh pass lo ka nei tur kha an phal ta lova, " Zoawi Lelte chuan a ti a. A chhungte'n phal lo engang mah se, inneih an tum luih tlat avanga Republic-a Seventh Day kohhran upa hnena an tlan luh tawp thu a sawi bawk a ni. "Kohhran upa hnenah chuan kan kal ta a, kan innei duh si engtin nge kan tih ang? kan va ti lut rawih a. Tichuan, a ni hriatpuinain kan in la lut a," a ti. Chutia an inlak hnuah chuan Pastor Thangpuimanga chuan ni 10 a phuar zet thu a sawi lai chuan a nui deuh suk a. Kei pawh ka lo then ve tha a!
    Ni 10 a ral hnuah an pa nena an phuarna chu Pastor Thangpuimanga chuan a phelh veleh mai a. A hmaa inneih pawh an phal lem loh kha Pi Vanlalruati chuan inneih an tum em avanga phal lo thei lo dinhmuna a chhungte an dah tlat avangin, April ni 10, 1979-ah Ngurbiaka (NgB-a) nen chuan an inneih thu a sawi ta. An inneih nia mi tam tak a tihbuai dan chenin a sawi kalh kalh a, "Republic-ah kan innei a, thenkhatin kan inneihna hmun tur kha Seventh Day tlangah emaw tiin an lo kal nual a, kan buai hlawm teh a sin," a ti. Kan hlimpui nasa hle. A man eitu zingah khatih laia Mizoram Chief Secretary, Surendra Nath a tel ve ngat thu a sawi bawk.

Sweet and Bad Combination!
    A pasal neih vel chungchang rei tak kan khel hnuah kum 1977-ah min let pui daih a. Hemi kum hian Sweet Combination an din thu leh, chutah chuan Vanhlupuii, Bobby Dingluaia (L), Joseph Zokunga, NgB-a, Saitluanga-te nena hun an hman chhoh dan min hrilh keuh keuh a. A sawi lai te chu Sweet Combination hun lai vela lo tal ve ila chuan ti tein ka lo inngaihtuah ve zut a. A zai ve hunlaia a vanneihna pakhat chu, Live band a nei tel tlat hi tun thlenga a vanneihna a nih thu a sawi bang lo. Live band angin - Ruata Zote, Saitluanga, Nghilhlova leh Peter C. Lalrinmawia-te nena an chet ho dan zawng zawng pawh a rawn phawrh chhuak a. Manipur-a Assam Rifles Ground-ah Zoawi Lelte tour an neih te leh Gandhi Memorial Hall, Imphal-a zan 3 zawn zata hall khat tuna an concert tumte kha a theihnghilh theih a inrin tawh loh thu a sawi bawk.
    Khati khawpa Mizoram pawn lamah pawh Zoawi Lelte an lo hlut hun lai chuan, khawvelah a tal nasat ve thu a rawn sawi daih a, a sawi ngam pawh ka rin lem lo chu rawn sawi chhuakin Zoawi Lelte chuan, "Thil ka zep ve lo. Khatih lai khan zu in te ka ching a, khawvelah ka tal nasa," a rawn ti chhuak phawng mai a. Ka rin aiin a 'frank' zek! Chutah, "Kan hunlai ve pawh khan hmeichhe tam takin zu te chu an in ru ve tho a; mahse, mipa bulah chuan an inzep tit tet thung. Kei ve thung chu, mipa zingah ka in pawp zel!" a ti. Chumi hnuah, khawvel ropuina te chu a rei lo thin em a ni tiro tia min en chunga a rawn sawi laiin ka ngaihtuahna pawh a pawt thui khawp mai.

Rockville, USA-ah
    An hunlai ang ngaihtuahin zaithiam tan US-a recording tih tum chu thil harsa tawpkhawk a nih ngei a rinawm. Mahse, Pi Vanlalruati thung hi chuan a tum em a, a thei tlat! "Pathian vang chu ka ti lo thei lo a, chumi dawtah chuan ka tumruhna vang a ni lo thei lo. US-a zai hrim hrim kha ka tum a ni tawp mai a ni," tiin a naupan lai atang tawha a tum tan daih tawh thu a sawi a. A tetlaia an inkhualtelemnaah pawh US atanga zin haw a nih dawn loh ai chuan a tel ngai loh thu a sawi, kan nui leh rih.
    Black Pond, Rockville, USA-ah chuan recording chu a ti ta ngei a. Mahse, awlsam tak chuan a ti thei hauh bik lo. "Hla 5 kan record tawh paw'n a ngai kan ti tlut tlut emaw an ti, hla thu vel chu engmah an hrethiam lo," a ti a. "Tumruh lo ila chuan, zak takin ka haw ang," Zoawi Lelte chuan a ti. Studio ropui tak a nih avangin tumruh lo tan chuan recording tih ngamna chi pawh a ni lem loah a ngaih thu a sawi bawk. "Tuna Richard Landon nupui Lalrinmawii chuan studio kha pui a ti lutuk a, recording ti ngam lovin a tlanchhia," tiin fiamthu titak deuhin a sawi a. A uipui thu a sawi lai chuan keipawhin ka rilruah ka lo 'amen' thuai a. Sap musician-te nena an inhmelhriat that leh an inkawmngeihna chu a chhawr avanga, man mang lova hla an record chhoh thu te a sawi hnuah Zoawi Lelte chuan, "Khatih laia recording tih man chu darkar khatah dollar 30 a ni. Nilenga tih te chuan kan chawi seng lovang," tiin a tum ruhna vang liau liaua hlawhtling an nih thu a sawi a.

 to be continue......