Oriflame Lalnu - Grace

Inthlahrung duh lem lo teh ang. Mi hlawhtling tak a nihna leh, a thawhrimna avanga ngaihsanawm tak, Grace chanchin hi ti kur leh luk ila ni mai! hehe...

Nikum hmasa khan India ramah 5-na a ni phak a, nikumnah 5-na atanga kaisangin step khatin hma a sawn a, 4-na a ni mek. Pali-na dinhmun ai sanga invawrh chhoh a pakhatna dinhmun luah phak pawh a tum. Mahse, hetiang dinhmun a thlen hma hian harsatna tam tak a paltlang a, Mizoramah Oriflame chanchin kan hriat bel hma hauhin bul a tan a, hna dang zawng zawng kalsanin chu hna chu a thawk a. Hlawhtling la inti lo mah se India ram chhunga pakhatna dinhmun hauh mai thei dinhmunah a ding chho ta hial a ni.    
    

Oriflame tia kan hriat lar, Cosmetics Multi-level Marketing sumdawnna hlawhtlin pui em em tu Grace Khiangte chuan he sumdawnna hi a tih tak tak hmain private school velah zirtirtu hna te a thawk kual thin a, chu chu kum 1997 chho bawrah a ni. 

Hetiang sumdawnna a luhchilh hmain Travel Agent lama-te hna a thawk thin a. Tuirial atangin zan dar 8/9 bawr velah in lam panin a haw thei chauh zel a. Chumi hnuah Private School-ah te insawnin zirtirtu hna a thawk chho leh a. Hetah pawh hian a tan chuan nau pawm chunga thawh theih hna chu zawn ngaiin a inhria a. "Naute enkawl chung chuan private school-a zirtirtu hna han thawh reng te a rem loh avangin nau pawm chunga thawh theih hna chu zawn thain ka hria a," tiin Grace-i chuan a sawi. 

Oriflame International Conference kal tawhna te :
1. Shanghai
2. Tenerife & Madrid (Spain)
3. Jhakarta (Indonesia)
4. Hainan (China)
5. Colombo (Sri Lanka)
6. Athens (Greece)
7. Kathmandu (Nepal)

    March 2001 a rawn inher chhuak a, private school-a thawk reng chungin Oriflame company-ah chuan consultant (member) ni turin beiseina sang tak nei chungin a inziak lut ve ta rawih a. He lai hmunah pawh hian a tum dan leh a lo suangtuahna ang kha a takin a tawng nghal mai lova, Mizo-te hian Direct-Selling lam hi hetih hun lai hian hmelhriat a la hlawh lem lova; an thil zawrh ber cosmetics ho man te a lo to vei bawk nen, mi nawlpui pawhin an sumdawnna chu kan la hriatthiam pui hek lo. Heti chung hian, Grace-i chuan a sumdawnnaah chuan mak tak maiin innghahna tham niin a hre thung si.

    Grace-i chuan, "A mak lutuk! Khati khawp khan miin ka sumdawnna chu an 'afford' lo em em a. Chutih laiin kei chuan Oriflame-ah hian rinna lian tak ka nei bawk si," a ti a. "An kutchhuak te a that piah lamah an sumdawn dan kalhmang kha tha dawn riaua hriatna ka nei tlat a. Chuvangin, he sumdawnnaah hian inpumpek thaa hriain ka rilru ka thlak ta zawk a," tiin a tira hunawl hnawhkhahna angreng deuha a hman thin chu hna dang zawng zawng kalsan a, Oriflame  buhzawlah tak tak luhchilh a tum tan thu a sawi bawk.

    Zirtirtu hna a bansan a, Oriflame chu a buhzawlah luhchilh turin a ke a chhep chho ta a. Mahse, a hmaa a suangtuah dan leh a rin dan ang dik diakin thil chu a kal hauh lo! Miin an la hmelhriat loh mai piah lamah an thil zawrh te chuan man to tih chauh a hlawh a, tu khaw khain an la pawmpui zo hek lo. He'ngte avang hian Grace-i pawh a rilru a hnual thei em em a, miin an hriatthiam pui hun tur chu enganga rei ngei a la nghah dawn tih lah a hmu phak hek lo.

    "Khatia bul ka han tan hnuah chuan ka tum dan leh lo 'dream' ang khan thil a kal zung zung lo a. Ka thian thenkhat phei chuan 'hlawhtlin a har dawn a nih hi' tia bansan ta te pawh an awm nual a," Grace-i chuan a ti a. A thiante'n bansanin, peihloh san mah se a ni chuan tlawm mai a tum lo a. Tlawm a hnekin beih tang tang a tum a, a bei tang tang a, beidawn mai a tum hek lo. Rilru hnual chang nei mah se beidawnna leh dawngdahnate chu inhneh tir mai a tum hek lo.

    Cosmetics lamah Mizo mipuite kan la hawi zau lo tih pawh a hria a, a hmu a; a taka a nitin hnathawh a nih avangin hlawhtlin mai a harsa dawn tih pawh a pha hauh lo ang. Dinhmun sang hauh tur phei chuan an thil zawrhte hralh hnem a ngai a, a hralh theih lo viau lahin awmzia a nei dawn hek lo. Miin a thil zawrhte chu 'man to' an lo tih sak zel bawk si!

    "Ka thil zawrhte chu a man to an tih theih em avangin hralh pawh a harsa thei viau a. Ka bei te pawh a dawng rum rum thin," Grace-i chuan a ti a. "Sum lu nei ten tawn sa kan nih loh piah lamah, bul ka tan lai kha chuan miin an la hmelhriat tha lem lo bawk nen. Tawpsan ve mai duhna thinlung pawh a rawn piang lek lek thin a," tiin a sawi bawk. He hnaa a zuan luh tak tak hma pawhin a rilru a insual nasat hle thu a sawi a. Chutiang karah mal tan chang a ngah thu pawh a sawi chhuak bawk a ni. Kum 1 chauh pawh ni lo, kum 3 (2001, 2002 leh 2003) chhung tal tawp chu he Oriflame hi a vahvaih pui a ni.  

    He hna a thawh hlim chuan fapa kum 1 leka upa a la ni a. Fa pakhat chauh nen chuan hna han thawh mai chu thil harsa a ni lem lo. Mahse, chhangchhiatna chuan a rawn umzui leh vat a. Heti chung hian a network ho enkawl a la thulh chuang lo. "Nau paw chungte hian thil ka zuar kual lawp lawp a," tia sawiin a changa a downline ho training-te pein hmun hrang hrangah te a kal thu Grace-i chuan a sawi a. Amah ngei pawh nau paw chunga zan khat pawh riak phal lovin Guwahati-a training tura a zin zawk thin thu pawh a sawi tel bawk a ni. 

    Hlawhtling tur chuan kawng thui tak zawh tur ala nei tih a inhria a; engtikah nge 'hlawhtlinna' an tih chu a nuna a rawn thlen ang tih lah a hre hek lo. Bul a tan tirh chuan tun angin mobile phone-te kan la hmelhriat lem lo a. Mizoram atanga Oriflame company biak pawhna hnai ber lah Guwahati hmunah a awm, chu pawh an stock point mai a ni a, an office pui lah a ni hek lo. A thil chah te chu sumo hmanga phurh ni tlangpui a, a phurhna man lah chuti vaka tlawm lah a ni hek lo. A tir lamah chuan engkim kha chawi belhin a kal a, "Ka hloh a nih pawhin ka ti ta sa sa pawi tihna ka nei lo," tiin beidawnna chuan a nunah thu a sawi tir duh chuang lo.

    A thian thenkhatte ang bawkin bul a tan tirhin beidawngin, lo thlauhthla se tun dinhmun hi a thleng lovang tih pawh a inhria a. A hna thawhna kawng pawh a chho hle tih pawh a hai hek lo. Miin a hnathawh laiah hmabak an hmuh loh laiin Grace-i chuan hmalam panin a kal zel lui tlat a. A kalna kawngah thimin bawm thin mah se beidawn phahnan a hmang lo. A tuarchhelnate chuan tun dinhmun hi a thlen tir tih pawh a chiang thawkhat viau a. Grace-i chuan, "Tupaw'n tih tak te-a hna kan thawh chuan hlawhtling lo tur kan awm lo," a ti a. "Hlawhtling tur chuan rinawmna leh taimakna a ngai thung," tiin a sawi zawm bawk. Hlawhtlinna kawng a zawh laia a rilruah thil lian tak a awm a, "Vai-nu mahin a theih chuan Mizo nu pawhin ka thei ngei tur a ni," tih thu hi.

    Mi tam takin tun dinhmun a thlen theih avangin an lawmpui a, 'I va han vannei tak' tih tawngkamte a tawng nawlh thin. Ni mah sela Grace-i chuan vanneih vangah a ngai lo a. Hetia hmaichhana miin an sawi pawhin a ni chuan, "Vanneih vang ni lovin duhthlanna a ni zawk," tia a chhan thin thu a sawi a. "Pathian malsawmna nasa tak ka dawng a, kan harsatna te leh ka hnathawh tirte atangin min veng a," tiin a hlawhtlin chhan ber chu Pathian a nih thu a sawi a ni.

    A beidawn duh lohna leh a hnathawhah a rinawm tlat vangte leh tih hram hramna thinlung a neih avangin hlawhtlinna pawh a hmu chho zut ta a. Kum 2003 khan Mizoram atangin Oriflame-ah Director title a hmu a, Mizorama hmu hmasa ber a ni nghe nghe. A kum leh 2004-ah Gold Director hmuin 2005-ah Sapphire Director-ah a kai chho leh a, kum 2007-ah phei chuan Diamond Director-ah kaisang lehin tun thla hian a thawhrimna leh taimakna vang liau liauin Oriflame chuan Senior Diamond Director a nei thar leh bawk ang. Kuminah chuan 1st Double Diamond Director nih a inbeisei bawk. Tunah hian India ram pum, Nation-wise ranking-ah 4-na a hauh mek bawk a ni. Helai hmunah hian din reng a tum hauh lo. India ram pumah pakhatna dinhmun luah pawh a tum chho mek bawk a ni.

    Heng zawng zawng bakah thil tam tak dawn te a nei ve nual tawh bawk a. Foreign trips, jewelleries, cash award-te lo dawng tawhin, Honda City Car a dawng tawh bawk a ni. Mahse, hengho zawng zawng aiin a downline-te hlawhtlin a hmuh ve zel avangin a lawm a, a hlim a, a hnathawh ang chu Mizo mipa leh hmeichhia tan pawha thawh theih vek a nih thu Grace-i chuan a sawi a. Thlatina a downline-te cheque Mizorama lo lut pawh hi tam tham tak niin a sawi a. A tlem berah Rs. 9,00,000.00 vel hi a lo lut thin niin a sawi bawk.