Ka nu duhtak!

He khawvel boruak ka rawn hip tan tirh a, engmah pawh ka la hriat fumfe loh lai atang tawhin duat takin min chawi a, duat takin pawm a, hmangaih takin min enkawl a, a chhia a tha ka hriat hma hauh atangin ka mamawh min pe a. Mihring ka chang lovang tih hlau ngawih ngawih chungin min awm tlei a, ka tan i hun hlu tak i seng phal a, phut let nei hauh lovin hlim takin i awmah chuan min bei tir thin. 

    Ka nu, he khawvela chhungkaw tam tak chuan an pa te awpna hnuaiah an khawvel hun an hmang a. Pa thlazar hnuaiah an duh an lam a, an chak zawng an eiin an in thin. An thla hi a muang bik ngawtin ka ring!
    Keini chuan pa tel lovin chhungkaw nunchan kan zir a, mi fate'n 'ka pa'n thil min hawn a..' an tih thawmte chu keini chhungkuaah chuan tih ve theih a ni lova; tih tum mah ila mi nuihzat kan hlawh zual sauh dawn tih pawh a chiang reng ti raw? Mahse, ka nu i ni a, nu ni mahla pa chan i chang a, 'pa' awmloh lang lek lo khawpin min enkawl a, mite'n an pa-te an thlamuan pui ang bawkin kei pawhin ka thlamuan pui thinna che hi a nep bik hauh lo. Ka nawmsakna tur zawnga nangmah zawkin hrehawm tawrh i thlangte kha ropui ka va han ti tak che em! 
    Ka nu, hmeithai fapa mai mai mah ni ila mite`n an fate an duat ang bawkin min duat a, an fate an hmangaih ang bawkin min hmangaihna a nep bik chuang hauh lo tih ka hria e. Rual ka pawl zawh loh bik i hlauhna chuan ramtuileilo-ah a siam lek lek zawk che a; chu chuan ka tana i inpumpek zia leh hrehawm tawrh i inhuam zia min hriattir a, fate chunga nu hmangaihna nasat zia hi tunge hrilhfiah thiam ang? Min hmangaihna hi ka nu, tumah rengin an sawifiah thiamin an ziak fiah thiam ka ring hauh lo asin.
    Rualawh a na ve thin tiraw? Mi nu leh pa te chuan an fate lawm zawng siam sakin, an duh duh an tih sak a, thawmhnaw chhuak thar leh tunlai ber ber an lei sak a. An fate mawi loh hlauvin an phe dawr dawr a, lehkha an zir sang lovang tih hlauvin zirna In tha ber berah an luh tir a, an fa te tan sum reng an seng hreh lo tih pawh i mit ngeiin i hmu a, a takin i tawng a, i rilruah rualawhna tuipui chuan a hual vel che tih pawh sawi kher ngai lovin i mitmeng atang chuan a chang chuan a lang chhuak ve thin. Ka nu, chutiang zawng zawng chu nang pawhin i fapa chungah tihsak i chak a, mi nu-te'n an fate tana insen an inhuam angin nang pawhin i inhuam reng tiraw? Mahse, mite chuan chhungkaw chawmtu tur 'pa' an nei a, an pa te bakah an nu te thlengin an tangrual thei a, nang chuan tanrual pui tur i nei ve si lo.    
    Ka nu, rual chu awt ve hle mah ila ka neih phak tawkah ka lung a awi a, ka neih phak loh te chu kei pawhin chutiangin ka awt ngawih ngawih bik lo asin. I taksa ka ti hah tawh a, i rilru tal hi chu tih retheih belhchhah ka tum tawh hauh lo. Mite'n thil hlu leh hausakna chu chenin, thuamhnaw man to leh tunlai chhuak thar apiang inbel tur nei mah se, ka nghei bik lo ka tih tawh kha. Nang ka neih chhung che chuan thildang ka mamawh em em hran lova; ka neih thil hlu dang, 'Ka Pa' ka chan tawh avangin nang chan leh zel hi ka duh tawh hauh lo.
    Keimah avanga hun harsa tak i lo paltlang tawh leh tawn mek hi ka damchhung chauh pawh ni lovin, ka thih hnu thleng pawha nang ka theihnghilh che hi ka inring ngai lova, ka phal hek lo.
    Pathian khi kan chungah a tha em em a, tun thlenga hring ka chan ve theihnan tiin nang ang bawka min hmangaihtu pi leh pu min pe a. Anni kaltlangin Pathian khian mal min sawm a, ruaka ka awm lohna'n ka hak tur min pe a, ka ei tur chaw min pe a, rual ka pawl ve theihnan ka tan hian an inseng huam a, an mit ka tlun lohna zawng zawng chu an hai der lui ve thin. Ka awmdanin a zir loh chang pawhin ngaihdamna mit-in min en a, zahngaihna nena min thlir chang hi tam hle mah se kei chuan ka lo hai der reng thin zawk mai pawh a. An mi hmangaihna chu ka thlir thiam pha lo thin zawk a, heivang hian mahni inngei leh inhuat chang chu ka nei ve thin. A chang phei chuan chapo pawh ka inti thin. Mahse, ngaihdam dil ka thiam lo a, ka thiam lohna ngawih ngawihah pawh inthiam lohna nei lek lo ang hiala lan chhuah chang ka nei fo thin hi kei pawhin sim pawh ka duh; nimahsela ka nu, engtik niah emaw chuan zantina min tawngtai sakna te chu a taka rawn thlengin, kei ngei pawh hian insiamthat hun pawh ka la nei ngei ang tih hi ka ring ve tlat a ni.
    Ka nu duhtak! Ka pa hi kaihthawh leh theih chu nise, engpawh ka huam ngei ang. Nimahsela, piang nawn mah ila, a theih loh zia hriat nawn bak tih theih a awm dawn chuang hauh lo. Kan tana tha lo turin chung lam khian a ruat ngai lo an tihte pawh hi hre thin mah ila, awih harsa tih chang ka ngah mai. Mahse, ka pain min kalsan hma hlauh lo se chuan, i hlutna leh 'nu hmangaihna' chu heti khawp hian ka hriat thiam phah kher lo mai thei asin!
    I thinlung ti na tu ka nih pawhin min la hmangaih reng a, ka thinlung erawh tih nat i hlau thung si.  He khawvela mi tam tak tan chuan mi pakhat lek ni mah la, ka tan chuan khawvel i ni mai lo, ka lei Pathian i ni. Chuvangin, nang hmangaih che hi thil atthlak leh mi a sawina pawh lo ni se, mi fing nih duh leh chak avangin he khawvel finna tui chawi ka tum ngai lovang. Nang hmangaih che hi natna hlauhawm ber pawh lo nita se, tihdam ka duh ngai lovang a. Nang hmangaih che hi retheihna ni ta sela, hausakna ka thlang ngai lovang. Nang hmangaih che hi enganga sualna pawh lo ni sela, that ka tum ngai ka ring lo.
    Hmangaihna a pan zawh poh leh tlin lohna pawh a rawn chhah a nih si chuan, ka tlin lohna leh fel lohna nang chuan i hmuh kan thin avangtein, ka laka i hmangaihna chu a va chhah zawk dawn em. Kan hmangaihte tana kan nung a nih si chuan, i beisei anga ka lo par chhuah leh si loh hian, i thinlung hi ka lo va han ti hliam nasa thin dawn tak em! Ka nu, ka tlin lohna leh i mit ka tlun lohna avangte hian min ngaidam hram ang che aw.
    Mite hmuhah leh hriatah hmeithai mai mah nila, keichuan ka ngaisang che a, mi te lakah zah kailo mah la kei chuan ka zah chein he khawvela ka cham chhunga ka lei Pathian hmuhtheih awmchhun i ni a. Min tawngtai sakna zawng zawngte engtik niah emaw chuan chung Pathian khian min la chhansak ve ngei ang tih ka ring tlat a, chutih hunah chuan nangnen hmun khatah kan chengdun tawh ang a, Pathianin kan tawngtainate min chhansak hunah zet chuan nang hmeithai ve mai mai leh a fapa an tih mai mai hian tudang ngai lovin Krismas pawh hlim leh lawm takin kan hmang dun thei tawh ang tiraw?
     Ka nu, Krismas lo thleng leh tur hi, midangte tan chuan lawmna leh hlimna hunpui ropui ni mah se kan tan chuan rualawhna kutpuiah a chang zo leh dawn si. Chhungkaw kim taka then leh rualte`n Krismas an hman lai han hmuh chang hi chuan rilru a nguiin, duhin duhlo mah ila, rualawhna thangah ka awk leh thin. Mite angin nu leh pa karah awm chu ni ila; he hunpui, Lal thar lo pian champhaah hian chhungkaw tam tak ang bawkin ka nu leh pate`n thil thar mawi tak tak min lei ve ngei ang tih pawh ka ring e. Mahse, chu chu ka duhthusam mai a ni a, he ka duhthusam avanga i rilru ka ti na palh hlauh a nih chuan min ngaidam ang che aw.
    Nang ka bulah i awm a, i kiangah ka awm bawk a, kan hnenah Pathian a awm chhung chuan kil khatah ka lung a awi ve tawk a, chutihrualin, he hunpui lo thlen hunah engmah tihsak theih che leh lawmsak theih che ka la neih theih loh avang zawkin hrehawm ka ti thin. Ka nu, mi chuan chhungkaw kimin Krismas an hmang thin a, hlim leh lawmin nau piang chu chibai an buk ngei ang le. Kei chuan, i tan hian tun dinhmunah tih theih tlemte chauh ka la nei, chu chu ka nu, "Krismas Chibai" buk chauh lo chu!