Ramhluna Hnamte-in min chhang em ni?

Zalen chhuak hmasa ah khan ‘Vulmawi Award’ chung chang leh ‘Lunglei leh Aizawl an ti deuh em ni?’ tih lam kha Zalen Thalai Khawvel huangah khan kan chhiar a. Kum engemaw zat liam ta atang khan Aizawl khawpuiah mi talent neite pual in, a bikin Rimawi lamah, Award sem a lo ni tawh thin a, an la sem mek zel bawk a. Chung zingah chuan Lelte Award hi a lar deuh ber chu a ni awm e. Lelte hian kum 20 chuang liam tawh ah khan Mizoram a mi lar leh hmingthate pawh a lo thlang tawh a, Miss Mizoram te thlengin a lo thlang tawh thin a ni. Rimawi Khawvel Award kan nei thin bawk a, tunhnai hian a thawm a reh ta deuh. Saiha khawpuiah Moonlight Award an sem thin bawk a,chumi hnu deuh fe ah Lunglei ah hian Vulmawi Daily chanchinbu Editor thahnem ngaihna in Vulmawi Award an lo buatsaih ve ta  a ni. A tir chuan Vulmawi Award hi Lunglei District huap chauh a tih a ni a, chutiang bawkin Moonlight Award pawh hian Saiha District leh Lawngtlai District chauh a huam thin niin ka hria.




Lunglei hi Mizoram khawpuite zingah Aizawl tih lohah chuan a lian ber a ni awm e, chuti chung si chuan Award siam leh heti lam chi reng rengah thawm a nei ngailo viau a, Saiha lamin Award regular taka an buatsaih theih tawh hnuah pawh an la ti ve hlei thei lova, hetia Vulmawi chanchinbu thahnem ngaihna a Vulmawi Award a lo awm ta hi Lunglei District tan chuan zai leh rimawi lam a hmasawnna chu a ni ve khawp mai.

Hei kumin 2010 hian Lunglei mai duh tawk tawhlo in Zoram pum an huap tir ve ta  a, Zoram pum han tih hian Aizawl lam an huap tel ta a ni deuh ber zawk a, hmasawnna chi khat chu a ni. Amaherawhchu Zalen Thalai Khawvel in a rawn sawi ang deuh khan categorise dan leh nomination an dah dan ah kha chuan an la tih than lohna a lang deuh a,Aizawl leh Lunglei in bitum tir ang thei dawn dawn a lanna pawh kha a nei reng a ni. Award a nomination siam dan leh Award pek danah hian  sap kan tih ho pawh hi an lo vui ve fo mai. Hman deuh tawh khan (a kum ka hre ta lo tlat) Grammy Award ah Heavy Metal category ah Metalica leh Jethro Tull ho an dah tlang a, Jethro Tull in Award an la ta daih kha, mi mak tih a tling a. Khang hun lai kha anmahni rau rauah Metalica vanglai tak leh lar lai kha a ni a, anmahni Metalica pawh khan lak an in ring hle a ni ang, an la na khawp mai. A hnu a album an siam leh khan a kawmah  ‘Jethro Tull ho kha lo in sum deuh tawh teh u’ ti lam hawiin an ziak tel kher nghe nghe a, an la lungrun hle chu a ni. Kan ngaihsan khawthlang ramah pawh Award semah hian lungawilohna a lo awm ve zauh zauh thin a ni ngei ang.

Helai kan Award sem thinah pawh hian sawiselna kan hre fo mai,a buaipuitute hi mihring ve mai an ni a, tiin kan hrethiam zel a. Mahse hetiang thil ropui buaipui theitute hi chu hriatthiam zel tur a thil ti fo lo hian felfai taka tih tum ta se a tha ngawt mai. Vulmawi Award a nomination a lang thenkhatte hi lang awm reng an nih laiin thenkhat lo lang ve ngawt hi chu a mak viau reng a ni. Mahse Zoram pum huap a an vawikhat tihna a ni bawk a, a vawi hnihna ah chuan improvement hmuh in beisei ila.

Mizo hi kan population a la tlem a, chuti chung chuan rimawi khawvel lamah hi chuan kan tlem ngaihtuah in kan langsar viau mai. Amaherawhchu hetia category hrang hrang then a Award han sem tur meuh hi chuan kan la daih rihlo niin a lang, a bik takin Best Group category ah te hian. Tuntum a Vulmawi in a rawn chhawp chhuahte ai a han thehchhuah tur Mizo band an awm nual mai. Tin, Male/Female artist tih ah te pawh hian album pakhat pawh la puitlin lo te pawh tunhma atangin kan Award neih thenkhat nomination ah an lang nual thin, kan la tlem deuh vang ah puh mai ila,a tha mai awm e. Mahse hetiang a Award kan la siam zel dawn a nih chuan Nomination siam ah Award Committee te an fimkhur a ngai hle a, chutiangin Award dawngtu tur thlan kawngah pawh a FAIR thei ang ber a tih hi Award Committee mawhphurh a ni ang. Award sem hi induhsakna lan tirna nilo in mi talent phochhuah sakna leh a phu ten lawmman an lakna a ni si a.

Zalen Thalai Khawvel in ‘Lunglei vrs Aizawl an ti em ni?’ tih hi chu ngaihdan mai nise,hei hi chu ni lul suh se. Aizawl hi Zoram khaw dang zawng zawngte khawpui leh kan nu leh pate chenna a ni a,tluk thu an awmlo e. Khaw dangte pawhin kan chung en te an ni a, anni Aizawl pawhin khaw dangte hi a te zawk leh nau zawk an nih angin en dan an thiam ve turah beisei ang u. Aizawl chu Aizawl nge nge tih a ni fo si a.

Vulmawi Award
Ramhluna Hnamte
(He thu hi, Sunday-a chanchinbu chhuak ZALEN ah tihchhuah a ni! Kan rawn chhuah ZALEN chhawng a ni e.)