Pathian I Hria Em?

Sakhaw puithuna laimu chu a fir em em a, chutiang lama insawrbing mi chuan Pathian thudik chu hre vek niin a inngai thin. Sakhaw zirtirna hrang hrangte chuan heihi a pawm lo thung. A chhan pawh Pathian ringtu sakhaw hrang hrangte chuan Pathian chu hriatchian/fiah zawh rual loha thuk leh ril a ni tih hi kan inzirtirna a nih vang a ni.

    Kristian mithiam hmasa St. Augustine chuan Pathian hre famkima inngaite chu a vau lawk a, Pathian i hre famkim a nih chuan Pathian a ni lo tiin Pathian thu zirmi St. Thomas Aquinas pawhin Pathian hriatna ropui ber chu, "Pathian la hre tawk lo nia inhriatna hi a ni," a ti.



    Upanishad puithiamte chuan hriatfiah zawh rual loh Pathian a nihzia an hria. Kena Upanishad chuan, "Mita hmuh phak loh thu a sawifiah zawhloh, thinlung pawhin a hre thiam phak lo, hrethiama inngai pawhin an hrethiam lo," a ti. Pathian hrilhfiah tumna zawng zawng piahah Brihadaranyaka Upanishad chuan, "Ni lo, ni lo.," tih a lo belh ve bawk. Safi Muslim puithiam Sarafuddin Maneri chuan, "Mithiam nuaih khat pawhin an hriatthiam phak loh, nang, mit leh thlarauin a hmuh phak rual loh chu," a ti. Sufi puithiam dang K.A. Sa'id pawhin, "Tumahin Pathian thu hre famkim an awm lo, i lei veng rawh," a lo ti ve bawk.

    Hnam hrang hrangte'n kan chin dan leh kan thil tawn dan a dang angin Pathianin keimahni min deh dan pawh a inang lo em em a, sakhaw hrang hrang zawmtu pawh kan tam reng ani. Amaherawhchu, chhungrila thlarau lamah min khawihna chin hi chu a inang deuh put mai a, a chhan ber nia lang chu min hiptu Pathian hi Pathian pakhat a nih vang a ni. Sakhaw dang dang zawmtu kan nihna te hian mihring thlarau nun thanlennaah hmun pawimawh tak a luah a, kan hnam chin dan milin kan lo kuaiher mai a lo ni. Hengte avang hian sakhaw dangte inzahsak leh a tawpa inzawmna an neihte hi inzahsak a pawimawh hle.

    Pathian chu sakhaw hrang hrang chunga awm a ni a, eng sakhua mah hian thudik pumhlum hriaa inchhal thei an awm lova, sakhaw dang zawng zawng khaikhawmtu inti thei pawh an awm lo. Pathian tih em em tu pawhin an hre famkim lo, sakhaw tinah hian Pathian hmel an hmu thei a ni tih phatrual a ni lo. RamaKrishna leh SS Baba Shridi amite chuan sakhaw rinna hrang hrang zawm a pawina an hre lem lo. Heng mite pahnihin an entir duh ber chu sakhaw tinah hian Pathian a awm a, thurin/chindan inzahsak tawn hi a ni. Pathian hianin eng hnam mah a thliar hrang bik lova, mi zawng zawng hi Pathian mite kan ni. Pathian ring em em mi leh a sakhaw vawng tha em em chu sakhaw dangin an ti thlabar thei lo.

    Sakhaw hrang hrangte inremkhawmna chu sakhaw tinte hian Pathian chu hriatfiah zawh rualloh a ni tih kan pawm theihna ah a awm. Kan sakhuaa thudik awmna chu Pathian hi thuk leh ril, hriatthiam zawh rualloh anihnaah hian a ni. Hengte avang hian sakhaw tinte hi indo ni lovin, kan inti famkim tawn a lo ni. Nun famkim leh Pathian nena inzawmna thuk nei tura beitute vek kan lo ni. Chu zinkawng zawh vek kan nih avangin, eng rinna pawh hi hlimna thlentu duhawm tak an lo ni vek a ni zawk lo maw?