2009-ah Lengzem aiin Gospel che tha - Sailova’n a la sai fuh zel!

Kum hmasa (2008)-ah gospel album (audio/CD) lamin lengzem hi an phak lo fo thin. Lengzem khawvel chuan gospel rimawi chu a thuhnuaiah dahin a lo awp bet reng tawh thin. Mahse, 2009 zet zawng a ‘pel’ lam tan kum tha a tih loh theih lo. Side B lam tan pawh kum chhia tih tur chu ni lo mah se, kum dang erawh an pha lo chiang a, an thuhnuaia kun reng thin lakah an thuneihna chu an hlan a ni deuh ber e.

    Kum 2009 chhungin kan zaithiam hrang hrangte zingah audio/CD album ti chhuak an awm leh nual a, heng zingah hian zaithiam lar nia kan hriat album ti chhuak zingah hralh lo fe fe, a ‘flop’ kan tih ang chi an awm nual a, anmahni ngei pawhin an album tihchhuah chungchang-ah a ‘flop’ zia thu sawi hreh lo pawh an awm nawk ania. Chung ho chu lengzem album an ni deuh fur bawk.

    A hma lama kan lo sawi tawh angin kumin hi lengzem lam ai thlawt chuan gospel lam chu an che tha hret a. Chu’ng zingah chuan Vanlalsailova hi Sailova a la ni reng tih chu 2009-a album ti chhuaktu zingah copy hralh hnem lawrlak a nihna chuan a ti chiang mai awm e. Mahse, a lengzem album a lo tihchhuah erawh a la pha lo chiang bal thung.

    May ni 1, 2009 khan  Sailova chuan a gospel album pathumna tur - ‘Min Ngaidam Rawh/Ka Nghakhlel Chhandamtu’ tih chu a tlangzarh a, he a album tihchhuah hi kumin chhunga album hralh tla ber a nih thu hi Mizoram rimawi huanga hmun pawimawh tak changtu Colney Brothers chuan an sawi a. Zaithiam dang album tihchhuah te chuan Sailova album hi an phak lo fai vek niin zaithiamte buaipuia, an album hralhna kawng lo kawh hmuha, lo pui tawh thintu Colney Brothers chuan an sawi. He thu hi Zion Street-a audio cassettee zawrhna dawr hrang hrangte pawhin an pawmpui a ni.

    Colney Brothers neitu Pu Bula chuan Sailova hian a album hralh kawngah tuma tluk phak a nih lohna chhan lian tak pakhat nia a hriat chu sawiin, “Amah hi a buk a rit ve hrim hrim a, chumi piah lamah chuan album siam a uluk a, a inseng nasa a, a studio ‘charge’ pawh a sang fal nalh a ni,” a ti. “Amah rau rauah kum hmasa lama a album-te kha a tluk lo nasa. Heti chung hian kan rimawi khawvel huangchhunga kumina album hralh hnem ber chu a la ni phak tho,” a ti bawk.

    Gospel lamah Sailova nena an sawizawm fo thin Lunglei nula zaithiam Bethsy Lalrinsangi a rawn lang ve leh a, a album pawh ‘Engkim I Ropui Nan’ tih a nih nghe nghe kha.

    Anni pahnih bakah Bawngkawn Pastor Bial Zaipawl Krismas album - ‘Lal Lungawi Kum Hun’ tih leh ‘Ka Lal Lenna’  album-te pawhin hmun sang a chang phak a, Baptist Zaipawl music video album leh Pi Lalremsiemi hlate - ‘Lalpa Min Hruaina Lamtluang’-te pawh gospel album hralh tam zingah sawi hmaih phal a ni lovang a. Thawm reh duk hnuaiah Vanlalhlana Krismas music video album pawh hi hralh a kal hle. Ve teh khiaha...

    Lengzem leh Lenglawng lamah April ni 21, 2009-a TBC-a’n a tihchhuah, a lenglawng album pa-hnih chuan a hmaa album a tihchhuahte chu phak lo viau mah se kumina hralh hnem ber pawl a ni a. A ni bakah hian Lung-lei nula zaithiam Lalropuii Pachuau lengzem album - ‘2009’ pawh hi hralh tam lamah chuan a invawrh sang ve hle a. T. Zorampela Hlate - ‘A Thar Leh Thin’ tih pawh hi Zion Street-a cassette zuarte leh Colney Brothers lamin kumin 2009 chhunga audio album an hralh hnem ber pawl a ni phak bawk.

    Lengzem lamin gospel album hralh tam ber Sailova chu an tluk lo hul hual a, Sailova chiah hi an tluk lo pawh a nih loh avangin, kum 2009-ah hian a ‘pel’-in leng an zem zawk a ni ber!