Monday, November 15, 2010

Vulmawi Award-ah chuan Lunglei versus Aizawl an ti em ni?

Hmana Mizoram chhim bial pual chauh ni thin kha, tunah chuan an kalphung an thlak danglam tawh - Mizoram pum tiin. An sem hun tur pawh chu a chiang thawkhat tawh a, December thla tir retah Lunglei khawpuiah sem tum a ni.

Tunlai chhanah Zo entertainment khawvela award chi hrang hrang siam thin te chuan ngaihhlut an hlawh tawk tawh lova, eng award mah hi Zoram mipui hian kan ngaihven tawh lem lo. Mahse, Lunglei atanga rawn zi chhuak Vulmawi Award hi Mizoram pum a nih tawh dawn avangin, an huang zauhna lamah engnge Vulmawi Award ni a tihte pawh hi kan hre deuh fur tawh ang. He Award-a category hrang hrang an siama thlan theih, SMS hmanga vote thlak theih a ni tih puanzar atang chiahin, Aizawl khawpui lamah pawh SMS hmangin - Chumi no. ah chuan heihi lo vote ve rawh, kan thiante an nia lo Vote ve hram rawh tih te thlengin SMS a vakvel a, heta tang ringawt pawh hian Vulmawi Award tih chu kan hre deuh fur tih pawh a hriat thawkhatah ngai ta ila.




Chutihrual erawh chuan, he Vulmawi Award hi internet lamah pawh pho chhuah a ni fo a. Thenkhatin an lawm viau laiin, category siam danah leh award dawng thei nominee thlengin sawiselna pawh a awm awl chuang lova. Chu'ng sawiselna tam tak chu 'Aizawl lam tan chance a vang' tihte, 'Lunglei lamin an hui deuh vek ang' tihte a ri nawk mai. Award dawng thei tur hming an tlar zingah pawh hming hriat dik hleih theih loh thlengin a awm a, internet lamah pawh ziak dik tura an tih hnu fe pawhin, hei erawh Top Three (3) an tarchhuah thlenga tih dikna la chhuah loh te pawh a awm nawk ania.

Internet lama Vulmawi Award an tarchhuah thinah hian sawiselna lian tak pakhat chu a awmang ve fu roh a. Category hrang hrangah hian Lunglei lam mi an awm lohna hi a vang pharh mai a, heihi a ri a ring hle. Lunglei lam chhuak Award a nih avangin Lunglei lam zaithiamte induhsakbikna a awm chu a rinawm hauh lo nain, khati zawnga kuai her duh tan chuan a awm ve veng vawng tho mai. Mahse, han ngaihtuah chet chet hian, tunlai zaithiam chhuak thar leh awm mekte zinga, la che peih leh che na, boruak lian tham la siam thei te chu Leitlangpui atanga chhuak hi an ni fur mai. Aizawl lam hi an reh deuh duk a ni chauh zawk em?

A enga pawh chu nise, he award hi December ni 3 zanah, Saikuti Hall, Lungleiah sem theih tura ruahmanna siam a ni a. Vulmawi Award an sem hmain, lo ching phar ve reng reng ila, top 3 chinte chu :

BEST NEW ARTIST ARTIST (Gospel)
1. C.Lalmuanpuii
2. CR.Laldingliani (Ka Tling si lo)
3. Freddy Lalremruata

Top 3 china an inthlitfim hnuah chuan hmeichhe pahnih leh mipa pakhat an awm tih kan hmu e. Hmeichhe pahnih zinga pakhat zawk CR Laldingliani hi chu Aizawl lam pawhin a music video thlir theihin a awm a, 'Ka Tling Si Lo' tih hla chu a single a ni. A pakhat zawk C. Lalmuanpuii erawh Lunglei lamah mi hriat hlawh chho mek a ni a. Leitlangpui lama a invawrhchhuah mek laiin, Zawlkhawpui lamin an la hmu mang lo a tih theih ang.

He Category-a a mipa awmchhun Freddy Lalremruata pawh hi Zawlkhawpuiah chuan hriat hlawh chho mek a ni nain, a nawlpui chuan kan la hmelhriat lem lo a ang. An ‘new’ leh lutuk pawh a ni mai thei e. An single theuh hi Vulmawi Award Organising committee lam pawhin tarlang se, tute nge an nih a, engang mi nge an nih tih hi hriat a awlsam zawk ngei ang.

BEST FEMALE ARTIST (Gospel)
1. Bethsy Lalrinsangi
2. Pensy B.Lalthangliani
3. Zoramchhani

Bethsy, Pensy leh RC-i te pathum inelna turah hian thlan tur bik hriatthiam a har duh ngawt ang. Chutihrual erawh chuan, an pathum zingah rau rau Bethsy hi internet lama a hla download hlawh ber nia sawi a ni. Zoramchhani leh Pensy pawh hi an duai bik lo.

BEST MALE ARTIST (Gospel)
1. Joseph Zaihmingthanga
2. TBC.Zaithanpuia
3. Vanlalsailova

Best Male Artist huangah hian PBK-a lang lo hi a mak ve angreng. Joseph Zaihmingthanga leh Vanlalsailovate pahnih hi tunhnaia zai chhuak tawh mang lo hi an ni. Anni pahnih hi team zuia rawngbawlna lama inhmang leh Speaker nihna chelh thei an ni. Anni pahnih karah hian TBC-a a rawn lang nawlh a, a mak hran lo. He huangah hian TBC-a leh PBK-a bakah Michael VL Rema te intlansiak ta zawk se, a inhmeh fu zawk mai thei, Joseph-a leh Sailova te lan ai chuan. PBK-a hi tunlai demand channel-a zai ngun ber pawl a ni pha hial lo maw?

BEST MALE ARTIST (Lengzem/Lenglawng)
1. C.Sanga
2. H.Lalhakima
3. Lungmuana

Album an siam vek tawh, an album siam tawh zingah H. Lalthakima hian a hralh hnem ber a rinawm. C. Sanga pawh hi demand channel lamah pawh a zai hnem malh malh hle a. A music video siam tawhte chu thlan hlawh ber pawl hi a ni deuh fur. Incarnation vocalist hlui Lungmuana pawh hi zaithiam lo tih tur chu a ni hauh lo. Hman deuh khan a solo album kha a tichhuak a. Mahse, kha album zet chu a reh deuh duk bik niin a hriat. He huanga khan ber tur chu H. Lalthakima a nih mai hmel e. H. Lalthakima chungah rinna lo nghat phawt mai teh ang.

BEST FEMALE ARTIST (Lengzem/Lenglawng)
1. F. Laldinmawii
2. Lalropuii Pachuau
3. Mami Varte

Leitlangpui zaithiam pahnih inkarah Mami Varte a lang ve nawlh mai. F. Laldinmawii leh Lalropuii Pachuau te hi an el tawk tak tura ngai ila, kan tihsual a rinawm hauh lo. Mami Varte hi chuan tunhnaiah 'Hmangaihna Vanduai' tih music video a siam khan thlan a rawn hlawh zawk a, tunah erawh a boruak a dai deuh duk leh tawh. Chutih laiin, F. Laldinmawii music video 'A Mak Ka Ti Mang E' tih hi chu a rawn khum zo lo a ni ber mai awm e. Tunlaiah na na na chuan.

Lalropuii Pachuau album '2009' pawh kha hralh tla tak a ni. Tunhnaiah music video tihchhuah a la nei lo nain, Krismas hla sain music video a siam dawn niin a lang.

He category-ah hi chuan Mami Varte dahthain, RP-i leh Dindini te inel tir ta ila - F. Laldinmawii hian award hi a lak zawk a rinawm.

BEST ALBUM (Lengzem/Lenglawng/Gospel)
1. Nang Nen
2. Nunhlui hla tha te
3. 2009 Lalropuii

'Nang Nen' tih hi F. Laldinmawii album tihchhuah hnuhnung ber leh a atana hmasa ber a ni. He album-ah hian a hla 'hit' leh a rawn lar chhuahna 'Lung A Leng Em Mai' tih kha telh ta se, tlemin tun aia a hralh tlak zawk ngei a rinawm a. He album pawh hi hralh tla lo zawk zawk a ni bik lova, chutih laiin Lalropuii Pachuau album, nikum kum tawp dawna Lunglei Saikuti Hall-ah a tihchhuah '2009' erawh a pha miah lo mai thei. Aizawl-ah thawm dim deuhin Dindini hian a tlangzarh thut a, kha khan a vaw chhia pawh a ni thei? Nunhlui Hla Thate tih pawh hi, ngaihnep chi a nih a rinawm loh.

BEST BEAT GROUP
1. Celevain
2. The Apples
3. The Chosen

Best Beat Group hi a mak angreng hle. Hetah hi chuan Lunglei lam vawrh-chhuah hrim hrim duhna thinlung hi an pu em maw a tih theih, Celevain an lo lan ve nawlh avangin!? Hei tak hi internet lamah pawh sawiselna a nasa a, Vulmawi award hi a vul tur angin a vul lo phahna tur tak ni pawhin an sawi.

He huangah hian engvangin nge Boomarang, Freddy's Nightmare tih bawr vel an lan lohna chhan ni ta ang le? Hmeichhe awmkhawmna band pahnih The Apples leh The Chosen te an rawn lang nawlh bawk a. Best Beat group huanga tih tur atan chuan music video - The Apples-in pahnih emaw chauh an siam bakah The Chosen chuan 'Broken Wings' music video chiah an la siam ve thung. Best Beat Group huanga khung tur atan chuan, hmeichhia an nih vang pawh ni chuang lovin, an hmalakna a la zim hret chauh ang.

Boomarang leh Freddy's Nightmare bakah DrLUKE te an chet dan han thlir hi chuan he huang hi sawisel hlawh ber pawl a ni mai awm e. Chuta karah music video pakhat - 'Run Away' chiah siam a, Aizawl lama la che chhuak lo leh boruak reh tak Lunglei lam band an rawn thehchhuak ve hi a mak hliah hliah a ni!

BEST CHOIR
1. Bawngkawn Pastor Bial
2. BCM Choir 2008-2010
3. Synod Choir

Thlan awm tak tak vek an ni. Nikum leh kumin kumtir lamahte chuan Synod Choir zai hi kan hre ngun viau a. 'Pathian Hmel' tih an album pawh hralh tla pawl chu a ni ve hrim hrim. An boruak pawh tun thlengin a la nung reng a tih theih hial ang chu. Hetih lai hian Bawngkawn Pastor Bial Zaipawl leh BCM Choir pawh hi hmaih phal chi an nih a rinawm loh.
Demand channel lamah pawh he zaipawl hming lang pathumte hi thlan hlawh vek an ni. Bawngkawn Pastor Bial Zaipawl hian award hi an lak mai ka ring.

BEST MUSIC VIDEO
1. A thlawn mai maw
2. Broken Wings
3. Khawnge i awm?

A Thlawn Mai Maw tih leh Khawnge I Awm tih hi Leitlang Picture siam ve ve an ni. Broken Wings erawh hi chu dinagrafix siam a ni ve thung. In el tur awm tak an in el pawh ti ila a sual lem lovang. Mahse, thil pakhat in perhsan a awm thei, chu chu Best music video award dawngtu hian best music video maker hi a dawn loh chuan a inkhingbai lo duh ngawt ang! Hetah hi chuan 'Broken Wings' hian award a dawng mai law'ng maw?

BEST MUSIC VIDEO MAKER
1. DinaGraphix
2. Leitlang Picture
3. Siama Video Production

Hei pawh hian sawisel a hlawh. DinaGraphix hi khawvel khawi hmunah mah a awm a rinawm loh! Internet lamah pawh vawi engemaw zat, mi chi hrang hrangin an sawisel tawh a. Mahse, chuti chung chuan vawikhatmah tih dik sak a la ni lo. He category-ah hian DinaGraphix hnenah hlan lo ngai ta se, tunge dawng ta ang le? dinagrafix nei tupa tan hi chuan a tha nat thlak duh ngawtin a rinawm!

Heng kan sawi bakah hian - Best Song Composer; Sports Person of The Year; Writer of the Year; Best Announcer/News Reader; Best Musician; Best Parliamentarian; Beat Comedian tihte pawh a la awm a. Hengho hi chu kan kal kan hrih ang.
Vulmawi Award Organising Committee bikin SMS Vote tel lova a thlanfel te a la awm cheu a. Chungte chu Best Jockey, Reporter of the Year, Life-time Achievement, Entertainer of the Year tihte an ni nawk mai.

Han en kauh kauh la, Lunglei inkarah Aizawl a awm ve pheuh pheuh chauh an tih pawh chu a pawmawmna lai a awm ve tho, an ti! :D

22 comments:

  1. hehe...hriat ngailoh deuh hlir anni e...a hria in in ziah han chhiar hian kan hre-awm ve leh mai zel...

    Leitlangpui lamah chuan phar-thay dawn ni maw??? Azl lam kal tum an tam em

    ReplyDelete
  2. Kal chu an awm nual ang.. ka ring...

    ReplyDelete
  3. i blog thim lutuk ah hian torchlight dah tel law law laaaaaaaaaaa

    ReplyDelete
  4. hahaha.... keimahah chuan a thim ltk lo asin le... na ti nge maw ni le....

    ReplyDelete
  5. Best Beat Group khi chu keipawh in sawi takah chuan a awm lo lek lek lo maw aw ka ti ve mai mai.. “Top 10 Indian Acts to watch out for" the rolling stones in a tih zinga mi Boomarang te hi chu lang ve awm tak chu an ni ka ti ve mai mai..:)

    ReplyDelete
  6. a nih khi maw le

    burgerstud2005

    ReplyDelete
  7. Aizawl leh Lunglei boruak siam tum lo la a nih chu Sir Chd

    burgerstud2005

    ReplyDelete
  8. Writer lam kha i ti tel ve lo va!! A bengvarthlak khawp mai. Ka hma amite sawi ang hian i blog hi khaw engah pawh puk lut ang vang vang kan ni alawm le...he he

    ReplyDelete
  9. sir chda blog a lut tur chuan torch lite cell 3 ken tel a ngai.

    burgerstud2005

    ReplyDelete
  10. A thim toh lo e.. siam tha toh e... sorry for the thimsss... :P

    ReplyDelete
  11. This comment has been removed by the author.

    ReplyDelete
  12. I sawi hi a dik hlawm khawp mai. Thalai huang lam ziak thin i ni bawk a, i sawi thiam, a ngaihnawm. Mahse, Lunglei vs Aizawl lam engmah a lang lo tih kan sawi tel ve duh hram e. Top 3-ah hian ka rin loh tak tak an lang hi kei pawhin mak ka ti, lang awm tak an lang lova, lang lo tura ngaih an lang leh si!

    ReplyDelete
  13. hehehe... Lunglei vs Aizawl lam engmah a lang lo i ron tih hi min lo hrilhfiah deuh la... :D

    I rin loh deuh deuh an lan nawk ang bawkin midang pawhin chutiang chu an hmu deuh fur ang. Chuvangin, lang tur bik deuh hi chu an awm tihna a ni mai lo maw? eh!

    ReplyDelete
  14. Aizawl lam Org. Comtt member i ni a, Aizawl lam atanga in thlang dik lo alawm. Mi tam takin an sawisel ta reng a nih hi. Tin, thlanchhuahte hi a fair tawk a, SMS vote hmu ang 3-te Top 3-ah an lang a, hetah hian Org Comtt-in thlan an nei tawh chuang lova, SMS-a vote hmu sang 3-te an lang ta mai a, hei vang tak hian rin loh tak tak an lang ta reng a nih hi!

    ReplyDelete
  15. sir chda te chuan in thlang dik lo a va ang ve...khi vulmawi daily a rawn puan che anih khi maw le:)

    burgerstud2005

    ReplyDelete
  16. Hahaha,.. nia.. min puh let daih a va an hmel ve... Best Beat Group-ah te khian Aizawl lam chuan Boomarang, Freddy's Nightmare DrLUKE tih te an tel a... Celevain an lang ve lau... Mahse, Lunglei lam chuan an rawn thur chhuak a, award pawh an la reng a ni.

    SMS inti, sms-a hmu sang ber pakhat chu 'A la lar lo em mai' an tih avanga award la ta lo kha tunge kha? :D

    ReplyDelete
  17. Chda chu tunge i nih chu ka hre ngai lova, i rawn khaikhin dan hi award sem hnu chuan a dik a mual mual chu a awm hi. Commt member a awm i nih phei chuan lungawi lohna nei, mahni telna han ching phar ta i ang hle mai ka lo ti ve mai mai e. I tih dik chin ka lo chhiar nghauh nghauh.

    ReplyDelete
  18. In rawn thurchhuahte chauh hi tling tur an ni lem lo tih SMS hmangin mipuiin min hmuhtir a, tam tak tling mahse, vote an hmuh that loh avanga lang ta lo an ni mai a, chutah chuan Lunglei leh Aizawl tih thu a lanna reng reng a awm lo. Top 3 thlannaah a vote tute thu a nih avangin mi vote-ah Org. Comtt. in thu a nei thei tawh lova, top 3-ah pawh an lang ta lo a nih khi. Celevain tlin chhan hi SMS-ah vote an hmu tha tihna a ni mai. Lunglei vs Aizawl tia khaikhin khaikhin hi a fuh lem lo.
    Aizawl lam atanga in rawn thurchhuah engemaw zat hi fuh lo a tam viau reng a ni.

    ReplyDelete
  19. Hahha.. leh ta mai mai thin a... puh tur i zawng ruai em ni?

    SMS vote in dah sang a, a tha e. Mahse, thenkhatah chuan 'SMS vote hmu sang ber a ni mai,' in tih laiin thenkhatah chuan SMS vote hmu sang ber pawh kha............... hehehe

    In thuruk hi ka hre ve nual ania, khawngaih takin min sawi chhuah tir lul lo teh ang. Hawh, tha te tein inkawm ang :D

    ReplyDelete
  20. Award re re SMS a innghat deuh tawp chu a hlutna a nep ther ther hle mai....Oscars te Grammy te hi SMS hmanga thlan ni se a hlu awmlo triah triah...tih te mai hi ka lo zep ve :D

    vox populi tih vel hi chu reality show ang chi Idol, Icon etc atan hian a tawk chauh lawm mawni zawk le...te ka tia

    ReplyDelete